LEGAZPI CITY – Arestado kan mga otoridad an sarong snatcher makalihis an panibagong pangbi-biktima kaini sa sarong 19-anyos na estudyante sa banwaan kan Daraga.
Saro sa mga naglamag sa suspek an babaying Public Safety Officer asin parking volunteer sa banwaan.
Segun ki Daraga Public Safety Office spokesperson Lorenzo Bañas sa intrevista kan Bombo Radyo Legazpi na nagkataon na nasa duty an saro sa saindang mga personahe na nagtabang ngani na mabukod an akusado.
Tulos man ining nadakop asin ipig turn over sa kapulisan ngani na masangatan nin kaso.
Napag-araman na P5,000 an laog kan wallet kan biktima alagad nasa P200 na sana suboot an narecover kan mga otoridad.
Pagbuyagyag ni Bañas na dati ng igwang record an suspek sa Daraga Municipal Police huli sa pangungulog sa live-in partner alagad nakalaya man sana makalihis na warang nagsunad nin pormal na reklamo.
Huli sa insidente, sinabi kan opisyal na padagos an pagigin alerto kan saindang mga personahes ngani na mapreventaran na mautro pa an kaparehong insidente.
Mientras tanto, nakatalaan man na magsairarom sa panibagong training an Public Safety Officers ngani na mas maadalan pa an tamang pag-handle sa mga siring na kaso.
