Inihayag kan Philippine Navy na nag-negatibo sa gunpowder residue an mga personahe kan Philippine Marine Corps na nai-deploy sa Senado kan magkaigwa nin putukan nin badil kan Mayo 13.
Segun ki Philippine Navy spokesperson Capt. Marissa Martinez na wara sa mga miyembro kan Marines an nagpaputok kan saindang armas.
Dagdag pa kan opisyal na an pag-negatibo sa paraffin test an nangangahulugan na dae direktang nagpartisipar an nasabing mga personahe sa nangyaring pagpapaputok.
Nilinaw man kan opisyal na warang napatawan nin anuman na padusa huli ta anas ini an ginibo an saindang mandato.
Marurumduman na naka-posisyon an marines sa parte kan Senado bilang parte kan pagpapaotob kan seguridad, sa irarom kan direktiba kan Office of the Senate Sergeant-at-Arms (OSAA).
Basado sa Philippine National Police Criminal Investigation and Detection Group (PNP-CIDG), napag-araman na 44 na mga fired cartridge cases an na-recober sa pinangyarihan kan insidente.
