LEGAZPI CITY – Paramientras na pigsarado kan Provincial Government of Albay an Peñaranda Park sa ciudad kan Legazpi makalihis madiskubre na dae pa palan ini tapos asin dae pa na-turn over sa saindang ofisina.
Magigirumduman na kan nakaaging sabado an buminagsak sa mga estudyanteng nagsisirong man sana kuta an bubong kan stage huli man sa namateang pag-uran sa ciudad na nagkawsa nin pagka-irido kan ibang indibidwal.
Segun ki Albay Governor Noel Rosal sa intrevista kan Bombo Radyo Legazpi na pighahalat pa ninda an final report asin base man sa inisyal na imbestigasyon an napag-araman na an bolt o su pigkakabitan nin mga turnilyo an naputol na nagresulta sa pagbagsakan kan mga bakal asin trapal na bubong kan stage.
Suhestyon niya man na i-slab na sana an bubong kan stage huli ta maski umuran an may matibay na sirongan an mga tawo siring man kun mainit an panahon huli ta wara nang kahoy na pwedesir mag-ulang kan init kan saldang.
Nag-orolay na man an Provincial Engineers Office asin Department of Public Works and Highways second district nganing tukaron an nasabing isyu.
Pigtaram pa kan opisyal na nakaluwas na an ibang biktima asin may nagtetenir na saro na nasa kritikal pang kamugtakan makalihis na matamaan sa payo kan buminagsak na bakal.
Personal niyang bibisitahon an kritikal na estudyante asin matao nin magkakanigong tabang asistensya para sa pamilya asin nagpromesa na dae ninda ini papabayaan.
Magigirumduman na contractor ng nasabing renovation iyo an Hi-tone Construction and Development Corporation na pagsasadiri ni Christopher “Kito” Co, asin an authorize managing officer man iyo an Albay Vice Governor Farida “Diday” Co na may kabilugang kantidad na P96M.
