LEGAZPI CITY – Nagsagibo na nin soft opening an Gobierno Lokal kan Donsol, Sorsogon para sa pagpopoon kan Butanding Season.
Segun ki Sorsogon Provincial Tourism Officer Bobby Gigantone sa intrevista kan Bombo Radyo Legazpi na igwa nang butanding na namamataan sa kadagatan kan provincia ngonian na bulan nin huli ta pigkokonsidera ninda an highly migratory movement kan mga ini.
Mawot man kaini nin Department of Tourism (DOT) Accreditation sa gabos na saindang mga frontliners arug kan butanding interaction officers nganing magin tourist ready sinda asin magin lisensyado na mga butanding officer.
Magigin magayon suboot na gabos sinda mga lisensyado nganing maasigurar na legal asin eksperyensyado an mga aktibidad na may kinaaraman sa pagpapauswag kan turismo sa provincia.
Pigtaram pa kan opisyal na makikinabang digdi an mga Sorsoganon poon sa sektor kan transportasyon, hotel, tourism frontliners asin iba pang serbisyo na makakatamasa kan magayon na epekto kaini.
Sa presente, target nindang maisumite sa DOT an gabos na rekisitos na kaipuhan sa accreditation ngonian na semana nganing matawan na sinda nin opisyal na mayor’s permit to operate nin huli ta nakasalalay suboot digdi an sustainable development sa lugar.
Komyansa si Gigantone na matatawan an mga ini nin accreditation nin huli ta aram ninda an saindang trabaho asin responsibilidad sa pagpagayon kan saindang serbisyo sa International Market.
