LEGAZPI CITY-Sinabi ni Senador Ronald “Bato” dela Rosa na saro sa mga rason kun nata siya liwat na nagbalik sa senado, huli ini sa supog niya makalihis an pirang bulan na pagtatago.
Segun kay dela Rosa, kadakol suboot na importanteng pinag-oolayan sa Senado na nangangaipohan kan saiyang presensya, kaiba an pagbabago sa liderato kan Senado asin an nakaabang na pagtukaw niya bilang impeachment court enkaso maipadara an articles of impeachment.
Afuera digdi, sinabi kan senador na naapektuhan siya kan mga puna kan publiko na nakaresibe suboot siya nin sweldo maski dai nagpapahiling asin dai nagtatrabaho.
Tinawan doon kan Senador na bako suboot niya ugali na magresibe nin bayad nin warang katumpad na serbisyo kun kya nagdesisyon siyang magbalik sa trabaho.
Marurumduman na nagpoon siyang dai magpahiling sa publiko anom na bulan makalihis sabihon ni Ombudsman Crispin Jesus Remulla na igwa suboot na warrant of arrest an International Criminal Court (ICC) laban sa saiya kasunod kan madugong kampanya kontra ilegal na droga kan administrasyon ni dating Presidente Rodrigo Duterte.
Si dela Rosa kaya an nagserbisng hepe kan Philippine National Police kan kasagsagan kan kampanya kan gera kontra droga.
Kalaunan kinumpirma kan ICC na igwang ipinaluwas na warrant of arrest laban sa senador poon pa kan Nobyembre 6, 2025.
Inako man ni Dela Rosa na nagtago siya makalihis na maresibe an impormasyon mapadapit sa nasabing mandamiento huli suboot sa peliggro sa saiyang kalayaan.
Sa presente, nasa protective custody si Bato sa Senado mantang pighahlat an magigin desisyon kan Korte Supreme katakod kan mga petisyong ipigsangat sa Senador.
