LEGAZPI CITY-Naghatod nin asistensya an ahensya de gobierno kan Sorsogon sa mga apektadong residente sa Guinobatan Albay kasunod kan pag-alburuto kan Bulkang Mayon.
Segun kay Sorsogon Provincial Spokesperson Dong Mendoza, sa intrevista kan Bombo Radyo Legazpi na nai-turn over na ninda an mga family food packs na hale sa Sorsogon.
Nasa anom na barangay an natawanan kan Municipal Social Welfare and Development Office kan Guinobatan kabale an Barangay Masarawag kun sain nasa 1,400 na food packs an naibarewas.
Sinabi ni Mendoza na huli ta igwa sindang mobility asin personnel, naibarewas ninda ini nin direkta sa mga barangay kaiba an mga kawani kan MSWDO Guinobatan.
Nakapagtao man sinda nin asistensya sa pagsasagibo nin flushing operation asin nagpaabot nin libreng inumon na tubig sa Barangay Travesia.
Afuera kaini, nagtao man sinda nin duwang fire trucks asin 2 water trucks.
Dagdag pa kan opisyal na bako na bago an saindang pagtabang sa panahon kan kalamidad huli ta talangang nangangaipohan an banwaan nin asistensya dara kan pag-alburuto kan Bulkang Mayon.
Nagsagibo naman sinda nin miting ngani makapagtao man nin tabang partikular na sa banwaan kan Camalig, Albay kun sain labing apektado man kan ashfall hale sa Bulkang Mayon.
