LEGAZPI CITY—Arestado an sarong 18-anyos na lalaki makalihis na makuhaan nin pigtutubudang marijuana asin drug paraphernalia sa Matnog Port sa Barangay Caloocan, Matnog, Sorsogon.
Segun ki Matnog Municipal Police Station Chief of Police Police Captain Wilfred Berdin, sa intrevista kan Bombo Radyo Legazpi, binisto an nasabing suspek na sarong Grade 12 student asin residente kan Daet, Camarines Norte.
Paliwanag ni Berdin na maagi na sa screening gamit an X-ray machine kun sain boluntad na ibinugtak digdi an saiyang coin pouch. Digdi na-obserbaran kan operator an kaduda-dudang laog kan pouch kaya ni-hold muna kaini an suspek asin sinugo na bukasan an laog kan saiyang pouch.
Nadiskubre sa possession kan suspek an sarong pakete nin marijuana na may gabat na 2 gramos asin estimated market value na P240, magin an drug paraphernalia.
Sa presente, masairarom na an nasabing suspek sa inquest proceedings.
Pagiromdom man kan opisyal sa publiko na mahigot na ipigbabawal an pagpupuslit nin mga ilegal na kontrabado sa nasabing pantalan huli sa sierto na madadakop sinda kan mga otoridad.
