LEGAZPI CITY-Pigsierto kan Department of Justice na nasa ligtas na kalagayan an testigong si alyas ‘Totoy’ o bisto sa bilang Julie Dondon Patidongan.
Segun kay Justice Secretary Jesus Crispin Remulla, sa ibong kan mga ipighayag kan nasabing testigo, pigsisierto kan kalihim an kaligtasan kaini sa presenteng panahon.
May proteksyon man suboot na ipigtatao para kay Patidongan orog na siya an testigong kapot ngonian kan kagawaran.
Ipighayag man kan kalihim na pigmamadali na an pagproseso ngani maisairarom na si alyas Totoy sa Witness Protection Program.
Sa paagi kan nasambitang programa, mas matatawanan nin proteksyon si Patidongan huli sa katakod na pondo para sa saiyang seguridad.
Kasunod kaini, naglalaom an opisyal na matapos na an pigsasagibong ‘evaluation’ kan prosecution sa mga reklamong ipigsangat kan mga kapamilya sa suboot mga mastermind kan kaso.
Sa presente, nasa ‘evaluation’ stage pa an mga reklamong murder asin serious illegal detention na isinumiter sa Department of Justice.
