LEGAZPI CITY-Nangapudan si Philippine National Police (PNP) chief Gen. Jose Melencio Nartatez Jr. kay Senador Ronald “Bato” dela Rosa na irespeto an uniporme asin badge na dati kaining sulot bilang dating hepe kan national police sa tahaw kan padagos na operasyon ngani masubaybayan an senador.
Segun kay Nartatez, nagtetenir an respeto kan PNP kay Dela Rosa bilang dating lider kan organisasyon, alagad naglalaom sinda na makikipag-kooperar ini sa nagpapadagos na legal na proseso mapadapit sa mandamiento de aresto kan International Criminal Court kontra sa senador.
Sinabi man kan hepe kan PNP na mahigot na nagsusunod an mga kapulisan sa mga protocols asin human rights standards sa mga operasyon asin pigsugo an mga ground units na maglikay sa dae kinakaipuhan na paggamit nin pwersa kun makua man an lokasyon ni Dela Rosa.
Si Dela Rosa kaya an mayor na pigtuturong arkitekto kan war on drugs ni dating Presidente Rodrigo Duterte asin iyo suboot an nangenot sa implementasyon kan Oplan Tokhang kan siya lider pa kan PNP.
Presenteng pinaghahanap si Senator Bato kan ICC na igwang koneksyon sa kasong crimes against humanity huli sa dai mababa sa 32 suboot an nagadan poon Hulyo 2016 sagkod Abril 2018.
Marurumduman na kan Mayo 21, pigsugo kan Department of Justice an mga law enforcement agencies na arestaron si Dela Rosa makalihis na dai makapaluwas nin Temporary Restraining Order an Korte Suprema kontra sa kooperasyon kan gobierno sa ICC.
