LEGAZPI CITY – Nakatalaan na midbidon an haros 50 establisimiento sa syudad nin Legazpi bilang 100% smoke-free establishments sa maabot na Nobyembre 24.
Segun ki Jose Balbin, enforcer kan Legazpi Smoke-Free Unit, sa intrevista kan Bombo Radyo Legazpi, nasa 50 hasta 60 sana sa labi 400 na establisimiento an nakaabot sa criteria nganing makaresibe kan recognition na ini.
Kabali sa mga kwalipikadong establisimento an mga eskwelahan, restawran, hotel, opisina kan gobyerno, asin mga barangay hall.
Kabali sa mga kriterya an pagbabawal sa pagpabakal nin mga produktong tabako, pagsigarilyo asin pag-vape, siring man an pagpahiling nin mga karatula na nagpapagirumdom sa publiko kan smoke-free policy.
Sinabi ni Balbin na nagkondusir sinda nin mga inspeksyon kabale na an sorpresang inspeksyon tanganing maseguro na an mga establisimiento nagsusunod sa eksistidong ordinansa.
Dugang pa kaini, taon-taon na pigrereview an estado kan mga minimidbid na establisimiento, asin pwedesir na i-revoke an recognition kun dai ninda mamantinir an pagsunod sa mga establisadong polisiya.










