Papalawigon pa an sakop kan voucher program para sa basic education sa irarom kan bagong pirmadong ley ni Pangulong Ferdinand Marcos Jr.

Sa irarom kan Republic Act No. 12327 o Basic Education Voucher Assistance Act, inaatasan an Department of Education na magtakda nin halaga kan voucher segun sa kakayanang pinansyal kan pamilya kan estudyante.

Nangangahulugan ini na mas dakulang ayuda an posibleng makua kan mga estudyanteng hali sa mga pamilyang kapos sa buhay.

Sakop man kan programa an mga estudyanteng hali sa middle-income households na kwalipikadong makakua kan nasabing ayuda.

Pangenot na tatawan nin prayoridad an mga estudyanteng nag-aadal sa mga pampublikong eskwelahan na sobra na an populasyon, asin an mga nakaistar sa mga lugar na wara nin haraning pampublikong paaralan.

Kabale man sa makikinabang an mga estudyanteng kaipuhan mag-enroll sa pribadong eskwelahan huli sa kakulangan nin mapipiliang subject o elective sa senior high school.

Itinatakda man kan ley an pagtatag nin Bureau of Private Education na mangangasiwa sa kalidad nin edukasyon asin regulasyon kan mga pribadong eskwelahan na kabali sa voucher program.