LEGAZPI CITY-Pinakusog kan Philippine Red Cross (PRC) asin Department of Education (DepEd) an saindang pagtatarabangan nganing pakusugon an kaaraman sa disaster preparedness asin ibusol an diwa nin volunteerism sa mga jovenes sa tahaw kan mga huma nin kalamidad, arog kan El Niño.
Nakasentro an nasabing kolaborasyon sa pagpakusog kan mga Red Cross Youth (RCY) club sa mga eskwelahan sa paagi kan pagsasanay sa first aid, cardiopulmonary resuscitation (CPR), asin disaster risk reduction and management, kaiba na an pagpapakusog kan mental health awareness.
Tinawan-duon ni PRC Chairman asin CEO Richard Gordon, na katuyuhan kan lakdang na ini an makamukna nin mga estudyante na bakong lang andam na magligtas nin buhay kundi may kusa man na mag-ataman sa kaligtasan asin pankagabsan na kapakanan kan saindang kapwa.
Ipinahayag man ni Education Secretary Sonny Angara an importansya kan paglinang nin mga bilog asin responsableng mamamayan, orog na sa panahon kan AI kun sain kaipuhan na maibalik an human touch asin kultura nin pagtabang sa sosyedad.
Nanindugan man si PRC Secretary-General Dr. Gwendolyn Pang na importante an papel kan RCY nganing maisalin sa gibo an mga humanitarian values asin matawan an mga jovenes nin oportunidad na linangon an saindang leadership skills.
Pormal na pagtitibayon kan PRC asin DepEd an alyansang ini sa paagi kan pagpirma sa sarong Memorandum of Agreement (MOA) para sa padagos na kooperasyon asin seguridad sa mga eskwelahan sa bilog na nacion.
