LEGAZPI CITY-Nanindugan si House prosecutor Bicol Saro Party-list Rep. Terry Ridon na dae pwedisir ipasa ni Bise Presidente Sara Duterte an paninimbagan sa suboot salang paggamit kan confidential funds sa saiyang mga staff.
Segun ki Ridon, dae pwedisir basulon an mga Special Disbursing Officers (SDO) o mga accountant huli ta kinakaipuhan an pirma kan hepe kan ahensya bago mailuwas an kwarta o mailuwas an tseke.
Sinabi man ni Ridon na igwa nin testimonya na hale mismo sa bise presidente an final approval para sa pagluwas kan confidential funds.
An confidential funds na pig-iimbestigaran nagkakantidad nin P612.5 milyon—P500 milyon para sa Office of the Vice President asin P112.5 milyon para sa Department of Education kan panahon ni VP Sara Duterte bilang education secretary.
Segun sa piskalya, kulang an mga dokumento ngani maipaliwanag kun pano pinaluwas an dakulang kantidad.
Nanindugan si Ridon na dapat madeterminaran kun sisay an tunay na responsable sa paggamit kan pondo asin bako sana an mga ordinaryong empleyado an dapat na panimbagon.
