Binatikos ni Vice President Sara Duterte an Philippine National Police kan Sabado huli sa suboot pagigin enforcement arm kan mga ini sa mga pulitiko.
Sa iniluwas na pahayag kan bise presidente, kinwestiyon ni Duterte an asal kan institusyon huli ta aniya kontra ini sa pig-aako na pagigin apolitical kan PNP.
Segun saiya, sa praktis, an PNP nagin nang enforcement arm kan mga pulitiko, na aram man suboot kan haros gabos na Pilipino na bakong totoo an pag-aako na apolitical ini.
Kasunod ini kan pahayag na iniluwas kan PNP manungod sa no rescue or release kan dating household staff member kan bise presidente, kaiba an apat pang indibidwal.
Nilinaw kan PNP na dai ikinulong o binihag an mga dating tauhan ni Duterte kan ibahan ninda an saindang mga abogado sa sarong hotel sa Taguig City kan Nobyembre 17.
Pigdoon man ni Duterte na dai nagsagibo nin tamang imbestigasyon an PNP manungod digdi asin tulos nag-abot sa premature conclusion antes pa man naestablisar an bilog na katotoohan.
Segun saiya, an arog kaining premature conclusion na dai muna pig-establisar an mga katunayan nakakapukaw nin seryosong pagduda sa pagigin patas kan institusyon asin sa pagsunod kaini sa tamang proseso kan batas.
Dugang pa ni Duterte, igwa suboot siya nin lima na documented threats na pakana kan PNP laban saiya, sa mga miyembro kan Office of the Vice President, asin magin sa saiyang pamilya.
Naghahadit man an Bise Presidente sa saiyang kasalbadohan, siring man sa mga Pilipino na nakaeksperyensya o natatakot na makaeksperyensya nin kapalpakan kan law enforcement.
Pig-enkaminar niya si PNP Chief PGen. Jose Melencio Nartatez Jr. na tawan nin pansin an pagtugon sa mga hinaing kan publiko imbes na ipagtanggol an institusyon kan pulisya asin an mga nasa kapangyarihan.











