Dae tinugutan kan International Criminal Court (ICC) an kahagadan na gumamit nin wikang Tagalog sa opening statement kan paglilitis sa kasong crimes against humanity na pigkakahampang ni dating Presidente Rodrigo Roa Duterte.
Sa ikalimang status conference, hinagad ni Paolina Massidda Principal Counsel of the Office of Public Counsel for Victims na tugutan an paggamit nin Tagalog sa pagheras nin nagkapirang testimonya kan mga biktima ngani na mas madaling masabutan kan mga Pilipinong nagsusubaybay sa paglilitis an saindang mga eksperyensya.
Sa ibong kaini, ipigduon ni Presiding Judge Joanna Korner na dapat magtenir na Ingles an wikang gagamiton susog sa mga patakaran kan korte.
Ipinaliwanag man niya na pwedesir gumamit nin interpretasyon asin magkaigwa nin salin kan mga transcript.
Mientras tanto, itinalaan kan Trial Chamber III an schedule kan paglilitis sa tig-sarong oras na pagdangog na igwang kasunod na 30 minutong break, basado sa napagkasunduan kan prosekusyon asin depensa.
Nakatalaan na magpuon an mismong paglilitis sa Nobyembre 30, 2026.
