Pigsugo kan International Criminal Court (ICC) si dating Presidente Rodrigo Duterte na pisikal na mag-atendir sa gabos na aldaw kan saiyang paglilitis sa kasong crimes against humanity na nakatalaan na magpuon sa Nobyembre 30, 2026 sa The Hague, Netherlands.
Tinawan duon ni ni ICC Trial Chamber III Presiding Judge Joanna Korner an kasuguan na ini sa tahaw kan ika-lima asin huring status conference kan kaso kan Lunes, Nobyembre 2.
Inuyunan man kan lead defense counsel ni Duterte na si Peter Haynes an kasuguan kan korte asin sinierto niya an pagsipot kan saiyang kliyente sa mismong courtroom sa oras na magpuon an trial.
Alagad tinugutan na lumiban an dating presidente sa status conference makalihis niyang i-waive an saiyang diretsos na mag-atendir, inutro kan korte na obligado siyang maghampang sa urualdaw na bilog na durasyon kan paglilitis.
Mientras tanto, kinumpirma ni Senior Trial Lawyer asin ICC Prosecutor Julian Nicholls na poco mas o menos 29 na testigo hali sa Pilipinas an nakatalaan na tumestigo sa pagultangankan video o audio-visual link (AVL).
Huli sa pitong oras na time difference sa pagultangan kan Pilipinas asin Netherlands, inayos kan korte an schedule ngani na maibitaran na lumagpas sa alas-8 nin banggi sa Manila an pagproseso kan mga testigo.
Huli digdi, pwedesir na puunan nin mas amay an pagdangog kan The Hague bandang alas-8 nin aga sa nasabing lugar, na katampad nin alas-3 nin hapon oras sa Pilipinas.
Pigsugo man ni Judge Korner an prosekusyon na enuton na dangugon an mga testigo na pisikal na mahampang sa korte antes isalang an mga testigo sa paagi kan video conferencing ngani na mamantenir an kaayusan kan trial.
Nagpaotob man an ICC nin iba pang logistical adjustments kaibanan an pagpapakarahay kan seating schedule sa laog kan courtroom para sa matanos na pag-usad kan pagdangog.
Afuera digdi, ipinaluwas man kan tribunal an organisadong timetable para sa mga nakatalaan na break time, lunch breaks, asin afternoon breaks sa bilog na panahon kan paglilitis.
Marurumduman na nahahampang an dating presidente sa mga kaso na may kinaaraman sa suboot paggadan asin mahewasan na pagbayolar sa diretsos humanos sa irarom kan saiyang kampanya kontra droga.
Opisyal na mapuon an makasaysayang paglilitis sa Nobyembre 30 kun sain nakatalaan na ilahad kan prosekusyon an saindang enot na argumento asin ebidensya.
