LEGAZPI CITY-Nagsakat na sa 12 an numero kan mga nagadan huli sa pagkarumpag kan sarong siyam na palapag na edipisyo sa Angeles City, Pampanga makalihis na makua an saro pang biktima ngonian na aldaw nin Lunes, Hunyo 1.
Segun sa Bureau of Fire Protection (BFP)–Central Luzon, narekober an ika-12ng biktima bandang alas 4:12 nin aga, pirang oras makalihis na ini enot na nadiskubre poco mas o menos alas 10:46 nin bangui. sa Domingo.
Sinabi pa kan BFP na naggamit sinda nin manlaen-laen na kasangkapan arog kan pry bars, sledge hammers, jack hammers, asin acetylene cutting tools sa pagtusok kan mahibog na kongkreto asin pagputol sa mga steel bars na nakakaulang sa retrieval operations.
Kasabay kaini, nagkondusir man nin disinfection procedures an Angeles City Health Office sa bilog na operasyon ngani na maprotehiran an mga responders na nagtatrabaho sa lugar.
Padagos pa an operasyon sa paghanap asin pagkua kan mga awtoridad.
Sa pinakahuring datos nasa 27 sa 47 na biktima an naisalbar na, mantang walo pa an pinaghahanap.
Magigirumduman na nagpoon an trahedya kan Mayo 24, 2026, kan marumpag an sarong pigkokostruhir na edipisyo, na nagin dahelan kan sarong dakulang multi-agency rescue operation sa ciudad.
