LEGAZPI CITY-Nagrapado na sa 20 an numero kan mga nagadan sa pananalasa kan nakaaging bagyong Inday asin habagat sa nacion.
Sa pinakabagong situational report kan National Disaster Risk Reduction and Management Council (NDRRMC) ngonian na aldaw nin Lunes, Hulyo 13, saro pa sana sa mga nagadan an kumpirmado mantang padagos pa an pag-validate sa ibang fatalities.
Segun sa ahensiya, sarong 70 anyos na lolo an kumpirmadong nagadan matapos malunod sa Barangay Kipaypayon, Quezon, Bukidnon.
Nasa sampulo sa nagadan an nairehistro sa Sarangani, anom sa Lanao del Sur, duwa sa Bukidnon asin tig-saro an binawian nin buhay sa Iloilo asin sa Davao Occidental.
Mientras tanto, siyam na na katao man an nairehistrong irido huli sa kalamidad mantang 16 an nairehistrong nawawara.
Sa kabilugan, apektado kan habagat asin nakalihis na bagyo an nasa 146,000 pamilya o katumbas kan 654,000 indibidwal hale sa labi600 barangay sa bilog na nacion.
Susog sa ahensya na an inisyal na kantidad kan danyos sa sektor kan imprastruktura nagrapado sa P3.18 bilyon.
Nagtetenir na kanselado an mga klase sa labi 400 siyudad asin munisipalidad mantang suspendido man an klase sa 48 lokal na gobierno huli sa raot nin panahon.
