LEGAZPI CITY-Uminabot na sa 32 an kumpirmadong nagadan huli sa pinagsararong epekto kan Habagat asin kan nakaaging bagyong Luis, Maymay, asin Neneng basado sa pinakahuring report hale sa Office of Civil Defense (OCD).
An probinsya kan Benguet an nakarekord nin pinakahalangkaw na numero nin mga biktima kun saen 15 an nagadan huli sa matinding pagrasay kan daga.
Nairehistro man an mga binawian nin buhay sa La Union, Rizal, Batangas, Quezon, Mindoro, Negros Occidental, asin Caloocan huli sa pagkalamos, pagkakuryente, rockslide, asin pagkahulog nin mga kahoy.
Apwera sa mga nagadan, 19 indibidwal an naireport na irido mantang tulo an pighahanap pa sa Quezon City, Manila, asin Batangas.
Pigkakarkulong nasa 8 Milyon na katawo o poco mas o menos 2.3 Milyon na pamilya an apektado kan raot nin panahon sa manlaen-laen na parte kan nacion, kabali na an labi sa 25,800 na indibidwal na presenteng nagtetenir sa mga evacuation centers.
Uminabot man sa P6.11 Bilyon an danyos sa imprastraktura, mantang P2.32 Bilyon naman an nawara sa sektor nin agrikultura.
