LEGAZPI CITY-Nagrapado na sa humigit-kumulang 390 an nagadan huli sa landslide na kawsa kan mahiwasang pagbabaha sa Nepal asin sa rehiyon kan Tibet sa Tsina.
Labi pa sa 1,400 na nawawara pagkatapos mga serye nin avalanche asin landslide na nagkawsa nin malalang pagbaha sa nasambitang lugar.
Sinabi kan mga awtoridad na dai mababa sa 389 katawo an nagadan sa Nepal asin tulo katawo naman sa Tibet.
Ginatos na mga lokal na residente asin dayuhan na turista hale sa India, Estados Unidos, Reino Unido, Canada, Australia, asin Tsina an kabali sa mga nawawara.
Naging matinding angat man sa mga gobierno an search and rescue operations huli sa mga naraot na kakalsadahan asin tulay sa mabukid na rehiyon.
Huli kaini, naggamit an rescue teams nin mga helikopter ngani magtao nin kakanon, bulong, asin mga tolda, siring man nganing i-ebakwar an mga nairidong residentes.
Basado sa siyentipikong pag-analisar, an trahedya nagin dahelan kan pagkarumpag kan dakulang porsyon kan glacier asin mga gapo sa Lhende River, na marikas na nagbagsak sa mga banwaan asin lambak.
An United Nations asin manlaen-laen na nacion nagtao na milyon-milyong dolyar na emergency aid asin inisyal na tabang nganing suportaran an mga apektadong komunidad.
