LEGAZPI CITY-Kinumpirma ni National Bureau of Investigation (NBI) Director Melvin Matibag na nagpaluwas na nin subpoena an ahensya sa nagkapirang personalidad katakod kan pagbusisi sa nangyaring pambabadil sa Senado asin pagtakas ni Sen. Ronald “Bato” dela Rosa.
Kaiba sa pig-papaapod kan NBI si suspended Senate Sergeant-at-Arms Mao Aplasca, Pasay City chief of police Joselito De Sesto, deputy chief of staff ni Sen. Robin Padilla na si Jean Robles, asin si Virgilio Carino.
Segun kay Matibag, posibleng maimbestigahan an papel kan mga nabanggit na personalidad ngani matukoy an pagkukulang sa seguridad asin kun igwang paninimbagan sa insidente.
Dugang pa kan NBI, obheto kan mga subpoena na makakuwa nin malinaw na testimonya asin makatabang sa pagbilog nin report.
Sa ngonian, padagos an imbestigasyon kan NBI asin pigsierto ni Matibag na warang sisay man an ligtas sa paninimbagan kun mapatunayang sangkot sa insidente.
Nabanggit man kan ahensya na an resulta kan imbestigasyon, pigsusumiter sa Department of Justice para sa kaukulang aksyon laban sa mga igwang paninimbagan.
