LEGAZPI CITY-Pigsierto kan National Bureau of Investigation (NBI) Director Melvin Matibag na preparado an NBI na arestaron si Senador Jinggoy Estrada maski nasa laog pa ini kan senado.
Ini makalihis na magpaluwas nin mandamiento de aresto an Sandiganbayan kan Biyernes, Mayo 29, 2026, kontra ki Estrada huli ta pigtutubudan ining imbwelto sa mga maanomalyang proyekto sa flood control.
Magigirumduman na sinabi kan Office of the Ombudsman na nakaresibe suboot si Estrada nin P573 milyones na kickback hale sa nasambitan ng proyekto.
Nanindugan man an Ombudsman na “no bail” an pigpataw na plunder case sa senador, kun kaya dae tulos pwedeng magkapag-piyansa katakod kan nasabing kaso.
Sa sarong press conference, pig-agid ni Matibag an sitwasyon sa pagprobar kan mga awtoridad na ipaotob an mandamiento de aresto laban ki Senador Ronald dela Rosa kan Mayo 11, 2026.
Dugang pa kan hepe kan NBI, kun pagbabasehan suboot an argumento na igwang local warrant an akusado, malinaw na magiging legal an pagdakop ki Estrada dawa yaon pa ini sa laog kan senado.
Enot nang sinabi kan NBI na igwang mga nakaaging kaso kun saen nadakop an mga mambabatas dawa nasa pwesto pa, kabali na si dating Senador Leila de Lima, Antonio Trillanes IV, asin an namaaram na si Juan Ponce Enrile.
