LEGAZPI CITY-Inasegurar kan Department of Justice na padagos pa an pag-abante kan kaso sa pagkawara kan mga sabangero.
Segun ki Justice Secretary Fredderick Vida, padagos an pag-abante kan kaso asin sisiertuhon na dae mapundo an piskalya sa pag-utob kan mandato kaini.
Sinabi niya na obheto kan mga piskal na panimbagon an mga nasa likod kan pagkawara kan mga sabungero, partikular na an negosyanteng si Charlie ‘Atong’ Ang asin iba pang imbwelto o kairibang akusado.
Pigduon kan kalihim na nakasentro an atensyon kan piskalya asin nakabase sa katotoohan an imbestigasyon.
Ipighayag ini kan kalihim kasunod kan mga bareta na an kampo ni Atong Ang, nagtao suboot nin kwarta sa mga pamilya kan mga biktima.
Sa ibong kaini, nanindugan si Justice Secretary Vida na dae direktang makakaapektar sa kaso an isyu kan distribusyon kan ayuda huli ta nakabase sa katotoohan an imbestigasyon.
Sinabi niya na an basehan kan kaso iyo an solidong ebidensya, kaya dae man importante kun igwa nin pag-withdraw kan testigo.
Ipinahayag kan sekretarya na apwera sa testimonya, piggagamit man bilang basehan an pigaapod na object o real evidence.
