LEGAZPI CITY-Naghampang ngonian na aldaw pasado alas-8:00 nin pagka-aga sa Quezon City Regional Trial Court Branch 98 si Vice President Sara Duterte para sa saiyang opisyal na arraignment katakod kan tulong counts kan kasong grave threats.
Pinaglalaoman na pormal na babasahan nin sakdal an Bise Presidente asin hihilingon an saiyang plead kun “guilty” o “not guilty” sa iminungkahing mga paratang kan korte, alagad sa presente dai ini naidagos.
Nagpoon an mga kaso sa pormal na pagsasangat kan Department of Justice kan Agosto makalihis an saiyang mga pahayag sa sarong online press conference kan Nobyembre 2024 mapadapit sa pagkua kan hitman laban kina President Ferdinand Marcos Jr., First Lady Liza Araneta-Marcos, asin dating House Speaker Martin Romualdez enkaso siya an magadan, bagay na saiyang pignegaran.
An arraignment dati nang pig-oktaba poon kan Setyembre 11 antes na magpadagos ngonian na aldaw, kasunod kan saiyang pag-post nin piyansa na P120,000 kada counts—na nakatalaan kan Setyembre 5 makalihis na mag-isyu nin arrest warrant an korte.
Mapadapit ini sa mga alegasyon nin pananakot asin paggibo nin mga pananakot, parte man kan mga pangenot na basehan para sa impeachment trial na saiyang pigaatubang sa Senado.
