LEGAZPI CITY-Natapos na kan National Basketball Association (NBA) an paghahanda sa duwang court na gagamiton para sa 2026 Finals.
Sa mga ladawan na ipinaluwas kan liga, tampok an disensyo kan hardcourt na may Larry O’Brien Trophy, an pinakaaasam na championship trophy kan NBA.
Nakatakda an enot na laban sa pagultanan kan New York Knicks asin San Antonio Spurs sa Hunyo 4, 2026 (oras sa Pilipinas).
Gaganapon an Game 1 asin Game 2 sa Frost Bank Center, an homecourt kan Spurs, mantang an Game 3 asin Game 4 naman sa Madison Square Garden, an homecourt kan Knicks.
Ini an enot na pagkakataon poon kan 1999 Finals na liwat na maglalaban an duwang koponan kun sain dinaog kan Spurs an New York sa laog kan limang kawat.
Sa nasabing Finals, nagibo nin kasaysayan an Knicks bilang kaenot-enoting No. 8 seed na uminabot sa championship series.
Ngonian na taon, liwat na nagpahiling nin tibay an Knicks makalihis nindang daugon an Cleveland Cavaliers sa paagi kan sweep sa Eastern Conference Finals.
Mientras tanto, pinatumba naman kan Spurs an defending champion na Oklahoma City Thunder sa sarong matinding Game 7 sa Western Conference Finals.
Piglalaoman na tututukan ngonian na taon an NBA Finals, kun sain liwat na mabubuhay an klasikong rivalry kan Knicks asin Spurs.
