Nagbilog nin ‘special panel of prosecutors’ an Department of Justice ngani na maglansar nin imbestigasuon dapit sa mga insidente na nangyari sa Senado.
Segun ki Justice Secretary Fredderick Vida na obheto kan ‘special panel’ na magkaigwa nin komprehensibong ‘case-buildup investigation ngani na maaraman asin maimbestigaran nin matanos an nangyari sa laog asin sa palibot kan Senado.
Tutugutan an mga piskal na nakadesignar sa grupo na matawan nin otoridad o poder ngani na mag-isyu nin subpoena asin iba pan kun kinakaipuhan.
Huli digdi, ipigsugo man ni Justice Sec. Vida sa mga law enforcement agencies na isumuter sa ahensya an mga ebidensya na kapot ninda dapit sa nangyari sa Senado.
Partikular na pigsugo kaini na makipagtabangan an Philippine National Police-Scene of the Crime Operatives, National Capital Regional Police Office, Pasay City Police Station asin National Bureau of Investigation.
An nasabing mga ahensya an tinawan nin 48 oras gani na magsumiter nin mga ebidensya katakod kan nangyari sa Senate Complex’ kan Mayo 13.
