LEGAZPI CITY- Nagpuon na an Commission on Human Rights (CHR) Bicol sa pagsasagibo nin imbestigasyon sa pagkagadan kan duwang mga aktibista sa Guinobatan na pigsasabing nanlaban sa mga pulis.
Sa intrevista kan Bombo Radyo Legazpi kay CHR Bicol Director Atty. Arlene Alangco, nagpadara na an komisyon nin team para sa inisyal na imbestigasyon asin nakikipag-ulay na sa mga kaparientes asin nakaibanan kan nagadan na sinda Jemar Palero asin Marlon Naperi.
Kung pagbabasehan suboot an mga pahayag kan kampo kan mga biktima, posibleng nagkaigwa nin pagbayolar sa derechos humano sa lado kan kapulisan lalo pang bako suboot na bastanteng rason an bandalismo kan duwang aktibista nganing gadanon an mga ini.
Alagad kung totoo man an report kan PNP na armado asin naenot na nagpaputok an duwa, magkakanigo man sana na maprotehiran kan mga otoridad an saindang sadiri.
Aminado si Alangco na amay pa ngani na masabi kung arin sa duwang lado an nagsasabi nin totoo kung kaya magsasagibo pa nin mararomang imbestigasyon sa kaso.
Target man kan CHR na makaulay an pigsasabing duwang pag-iriba kan mga nagadan na aktibista na magpapatotoo kung ano talaga an nangyari.
