LEGAZPI CITY-Nagpadara na an Philippine Coast Guard District Bicol nin mga personahes gikan sa saindang disaster response group ngani magtaong asistensya sa mga apektado lugar huli sa pag-alburuto kan Bulkang Mayon.
Segun kay PCG Bicol Spokesperson Lieutenant Junior Grade Alyzza Novie Bermal, sa intrevista kan Bombo Radyo Legazpi na nasa 38 personahes an naipadara ninda sa mga apektadong komunidad partikular na sa banwaan kan Camalig asin Guinobatan sa Albay.
Dagdag pa kan opisyal na an saindang deployable response group, igwang eksperyensya sa disaster response, igwang physical training, asin igwang kakayahan na magsagibo nin clearing operations sa mga hazardous conditions.
Kairiba man sinda sa nagtataong suporta para sa pagtanggal kan mga abo sa kakalsadahan asin kritikal na lugar ngani maibalik na an access roads.
Siring man an pagtatao nin asistensya sa mga lokal na gobierno para sa humanitarian response asin pagbabarewas nin food packs.
Padagos man an contigency plan kan ahensya asin pig-aabisuhan an gabos na magsunod sa abiso kan mga otoridad para sa saindang kaligtasan.
