LEGAZPI CITY-Inanunsyo kan Department of Energy (DOE) na naibalik na an kuryente sa 4 milyon hale 4.8 milyon na kaharongan asin negosyong apektado kan Bagyong Tino asin Bagyong Uwan.
Segun ki Department of Energy Secretary Sharon Garin, nagpapadagos an saindang 24/7 power restoration efforts bilang kasimbagan sa direktiba kan gobierno.
Naibalik naman suboot an linya nin transmisyon sa Catanduanes kaibanan na an Virac-Codon asin Virac-San Miguel.
Kadakol man sa mga pribadong kompanya nin kuryente sa Luzon asin Visayas an nakatapos na kan restorasyon, kabale na an La Union Electric, Subic Enerzone, asin Mactan Electric.
Kabale man sa isinagibong operasyon an mga ospital asin mga esensyal na pasilidad arog kan mga pumping station.
Target ngonian kan ahensya na maibalik an kuryente sa natatadang 800,000 na apektadong kaharongan asin negosyo sa mga masunod na aldaw, na may target na petsa para sa kumpletong restorasyon sa manlaen-laen na lugar.
