LEGAZPI CITY—Nangangapodan ngunyan an provincia kan Catanduanes sa mga ahensya de gobierno na maresolbaran an pigkakahampang na problema sa suplay nin kuryente magin sa tubig.
Segun ki Catanduanes Governor Patrick Azanza, sa intrevista kan Bombo Radyo Legazpi, huli ini kan rotational brownout asin padagos na load shedding kan saindang electric cooperative, magin an epekto kan El Nino na nagreresulta sa pagkamara kan suplay nin tubig sa provincia.
Katakod kaini nangangapudan an saindang opisina na maaksyunan ini kan National Electrification Administration, Department of Energy, Energy Regulatory Commission, National Power Corporation (NAPOCOR) an problema sa suplay kan kuryente.
Nangangapudan man si Azanza ki Presidente Ferdinand Marcos Jr. na makiaram an Office of the President sa paagi kan national agencies urog na kan DOE asin National Electrification Administration nganing matabangan na mamanehar an dae pagkakasinabutan kan Board of Directors kan First Catanduanes Electric Cooperative, Inc. (FICELCO) asin FICELCO management na maayos tulos an isyu sa Emergency Power Supply Agreement (EPSA).
Dugang kan gobernador na importante man an paglaog kan renewable sources energy sa saindang lugar.
Mientrastanto, pig-asigurar man kaini an namamanwaan na pigggibo niya an gabos nganing maresolbaran an saindang problema sa kuryente.
