LEGAZPI CITY-Uminabot sa 44 degree celsius an heat index sa Catanduanes kan suudma, Mayo 19, 2026.
Segun kay Catanduanes weather specialist Jun Pantino, sa intrevista kan Bombo Radyo Legazpi na kadakol an epekto kaini sa lugar, partikular na sa agrikultura asin suplay nin tubig, orog na nasa 40-44 degree celsius an nai-record ngonian na bulan kan Mayo.
Pinakahalangkaw man na nai-rehistro sa banwaan, nasa 47 degree celsius na naghaloy nin sarong aldaw.
Nakakaapektar man an labing init sa salud, orog na sa igwang mga helang, siring kan asthma o komplikasyon sa puso.
Paliwanag ni Pantino na enkaso ma-expose sa aldaw, otomatiko na nagluluwas an kahelangan.
An padagos na paglangkaw kan heat index, huli sa pag-init kan kadagdatan asin sa climate change.
Huli digdi posibleng mamatean an heat cramps, heat stroke enkaso masobrahan sa exposure sa init, orog na an igwang high blood pressure.
Kun kaya pagirumdom kan opisyal na pirmihang mag-inom nin kadakol na tubig.
Siring man sa mga nagtatrabaho sa luwas, na dai masyadong mag-expose sa init asin maggamit nin pag-ulang sa init kan panahon.
Kadalasang nagpopoon an pag-marka kan tag-init sa bulan nin Mayo, kun kaya pig-aalerto na an gabos sa posibleng huma kan El Niño.
