LEGAZPI CITY – Biglang nagkalayo an sarong traysikel sa tinampong sakop kan Sorsogon City.
Segun ki Bureau of Fire Protection Sorsogon City Chief Public Information Officer Fire Officer 3 Mae Ann Callos sa intrevista kan Bombo Radyo Legazpi na sarong security guard kan sarong establisyemento an nagtumpos kan kalayo gamit an fire extinguisher.
Dae man suboot naipaabot sainda an nasabing insidente kun kaya kan mahiling ninda sa social media an video kan kasulo an tulos sindang nagsagibo nin imbestigasyon mapadapit sa kawsa kaini.
Basado man sa isinagibong inisyal na pag-iimbestiga na nagkaigwa nin gas leak an traysikel asin kan pigporbaran na paandaron kan driver an saiyang behikulo an digdi na ini nagkalayo.
Pigtaram pa kan opisyal na nagsapo sana nin partially damage an nasulong traysikel asin wara man na ibang behikulo an nadamay huli sa marikas na pag-aksyon kan nasabing security guard.
Sa presente an pig-aaram pa kan saindang mga imbestigador kun pwede pa mapakarhay an nasulong traysikel asin magamit liwat kan driver.
Pagirumdom ni Callos sa publiko na permihang i-check an saindang mga behikulo partikular na an mga makina urog nang labing init an naeeksperyensya sa nasabing ciudad.
Mientrastanto, padagos man an saindang information
campaign asin mga training sa mga establisyemento nganing magkaigwa sinda nin mga kaaraman kun pano magresponde enkaso magkaigwang kasulo.
