LEGAZPI CITY — Pinunan na sa nagkapirang lugar an rehabilitasyon sa sektor kan agrikultura makalihis na maapektaran an mga pananom asin mga kahoy sa pag-aalburoto kan bulkang Mayon.
Sa intrevista kan Bombo Radyo Legazpi ki Guinobatan Mayor Gemma Ongjoco, naresibe na suboot kan nagkapirang mga paraoma an pinanaong seedlings asin pananom para sa liwat na pagpuon kan pagbungkal kan daga asin pagtatanom.
Kaibanan sa mga natawanan nin inisyal na tabang an mga paraoma sa luwas kan 6-kilometer Permanent Danger Zone (PDZ) mantang pighahalat muna an enterong pagbaba kan aktibidad kan bulkan sa iba pang affected farmers.
Base sa report kan Office of the Civil Defense (OCD) Bicol, maabot sa P200 million an danyos na ipigwalat kan Mayon eruption sa nasabing sektor kun saen paroy an nakapagrehistro kan highest damage sa commodity na sinundan kan high value commercial crops, mais, abaca asin sa sektor kan pagsisira.
Inasegurar man kan Department of Agriculture (DA) an dagos-dagos na pag-aabot kan tabang sa paagi kan Survival and Recovery (SURE) Loan asin Production Loan for Easy Access (PLEA) Plan.
