LEGAZPI CITY-Nagbuga nin abo an Bulkang Mayon ngonian na aldaw nin Biyernes, Mayo 8, 2026.
Padagos an pagpapahiling nin aktibidad kan Bulkang Mayon, susog sa pinakahuring datos kan Philippine Institute of Volcanology and Seismology (Phivolcs).
Halangkaw man liwat an aktibidad kan Bulkan mantang nagtetenir sa alert level 3.
Susog sa pinakahuring datos kan ahensya, padagos an pagdaloy kan lava sa may basud (3.8 km), Bonga (3.2 km), asin Mi-isi (1.6 km) gullies kasabay an panaka-naka asin maluluyang strombolian activity.
Nai-rehistro man an nasa 30 volcanic earthquakes kaiba an 15 volcanic tremors na naghaloy nin apat hasta 35 minuto,siring man an 290 Rockfall events asin 3 pyroclastic density current signals o uson.
Padagos man an pagbuga kaini nin Sulfur Dioxide na nasa 2, 272 tonelada sa kada aldaw poon pa kan Mayo 7.
Mientras tanto, mahigot man giraray na pinagbabawal an paglaog sa 6km danger zone huli sa peligro kan ashfall.
