Nag-abot na sa India si Presidente Ferdinand Marcos Jr. para sa limang aldaw na na state visit.
Naglapag an eroplanong nilunadan kan presidente sa Indira Gandhi International Airport sa New Delhi.
Kaiba kaini sa pagbisita si First Lady Liza Araneta-Marcos asin delegasyon kaini kan sabaton sinda kan mga opisyal kan India asin hinandugan pa nin tradisyunal na Indian dance.
Pakatapos kaini nagpasiring an presidente sa Taj Mahal Hotel para sa courtesy call ki Indian External Affairs Minister Dr. S. Jaishankar asin nagkaigwa nin briefing sa saiyang state visit.
Piglalaoman man na makakasalamuha kan Presidente an Filipino community na nasa India.
Basado sa datos kan Department of Foreign Affairs, nasa 200 na mga Pinoy na kadaklan nasa New Delhi mantang nasa 1,356 na Filipino an rehistrado sa India.
Ngunyan na Martes makakasalamuha kan presidente si Indian President Droupadi Murmu.
Magkakaigwa nin bilateral meeting an presidente ki Indian Prime Minister Narendra Modi kun saen didiskotiron kan duwa an mahigot na relasyon kan India asin Pilipinas.
