Inanunsyar kan Department of Energy (DOE) na uminabot na sa nacion an kabilugan na 178 milyong litro nin diesel bilang parte kan lakdang kan gobierno na pakusugon an suplay nin langis sa tahaw kan nagpapadagos na kariribukan sa Middle East.
Segun sa ahensya, an huring shipment an kumpleto sa apat na kargamento sa irarom kan Executive Order No. 110 na ipinaluwas ni Presidente Ferdinand Marcos Jr. ngani na protehiran an ekonomiya kontra sa pabagu-bagong presyo kan langis sa pang kinaban na merkado.
Sinabi ni Energy Secretary Sharon Garin na an matrayumpo na delivery, na pinamayuhan kan Philippine National Oil Company-Exploration Corporation (PNOC-EC), an patunay kan aksyon kan gobierno ngani na masierto an bastanteng suplay kan langis sa nacion.
Ibabarewas an shipment sa mga pangenot na huba sa Batangas, Subic, asin Davao ngani na magkaigwa nin bastanteng suplay an manlain lain na parte kan nacion.
Tinawan duon pa kan Department of Energy na importante an pagreserba na ini ngani na masierto na magpapadagos an operasyon kan transportasyon, logistics, asin agrikultura.
