LEGAZPI CITY – Pig-aandaman kan mga opisyales kan Barangay Victory Village South, Legazpi City an posibilidad nin pagrasay nin daga sa saindang lugar makalihis an magdamlagang pag-uuran.
Segun ki Punong Barangay Basilia Capino sa intrevista kan Bombo Radyo Legazpi na antes pa man an magkakasunod na aldaw nin pag-uuran an nagbugtak na sinda nin mga barikada nganing mapugulan an mga nagrarasay na daga asin direktang maka-apektar sa saindang residente.
Dae man ninda pigtutugutan na mag-agi an mga behikulo sa mga kakalsadahan sa saindang lugar na komon o dati nang naka-eksperyensya nin kaparehong insidente huli sa huma kan mga makalat na debris na pwedesir magresulta sa aksidente.
Ipinagpasalamat niya man na sagkod sa ngonian an wara sindang nairehistrong pagrasay nin daga na nangyari sa saindang lugar asin mantenidong passable an mga kakalsadahan para sa publiko asin behikulo.
Piglinaw man kan opisyal na padagos an saindang monitoring sa mga landslide prone sa saindang lugar sa ibong kan warang residenteng naka-istar harani digdi.
Suhestyon niya man sa lokal na gobierno an pagpapatugdok nin riprap nganing masulusyunan an saro sa saindang problema alagad dae suboot ini maisagibo huli ta private property an parte kan nagrarasay na daga.
Abiso ni Capino sa mga maagi sa apektadong parte nin landslide sa saindang barangay na magin rigmat sa pagrasay nin daga anumang oras huli sa mga warang patod na pag-uuran.
