LEGAZPI CITY- Naka alerto na an mga kapulisan sa Albay sa mga saitwasyon sa provincia katakod kan posibleng epekto kan Bagyong Domeng.
Segun ki Albay Police Provincial Director Police Col. Noel Nuñez sa intrevista kan Bombo Radyo Legazpi, partikular na pigtututukan kan kapulisan an posibilidad kan preemptive evacuation kan mga nasa 7km hasta 8km extended danger zone kan Bulkang Mayon.
Pinagkakahaditan kaya na magkaigwa nin epekto an mga pag-uran na posibleng darahon kan nasabing raot nin panahon sa aktibidad kan bulkan.
Marurumduman na saro sa mga pinag-aandaman ngunyan iyo an pagdausdos kan lahar kun makaka eksperyensya nin mga pag-uran.
Ini an katakod man liwat kan nagpapadagos na aktibidad kan Mayon volcano, na presenteng nasa alert level 3 pa.
Segun ki Nuñez na mahigot an direktiba sa mga kapulisan na siertuhon an kaligtasan kan mga namamanwaan asin masiguro an zero casualty sa panahon kan kalamidad.
