LEGAZPI CITY – Duwa katawo an kumpirmadong gadan makalihis an sarong gun bust operation kan pulisya sa Barangay Rawis, Legazpi City.
Segun ki PCol. Noel Nunez, Provincial Director kan Albay Police Provincial Office, sa intrevista kan Bombo Radyo Legazpi, nagpoon an operasyon alas 4:30 nin hapon makalihis makaresibe nin impormasyon hale sa sarong confidential informant manungod sa bentahan nin iligal na armas.
Durante kan transaksyon, biglang nanlaban an sarong suspek asin tinamaan sa likod an sarong pulis, alagad nakaligtas ini huli ta nakasulot nin vest.
Nagresulta an enkwentro sa pagkagadan kan duwang suspek, mantang padagos na pigpoproseso kan Scene of the Crime Operatives (SOCO) an crime scene tanganing dai makontaminar an mga ebidensya arog kan kwarta, badil, asin iba pa.
Basado sa rekord kan pulisya, an mga suspek imbwelto sa akyat bahay asin panhahabon sa Batangas, Camarines Sur, Albay, partikular sa Legazpi asin Ligao, asin Sorsogon.
Saro sa mga suspek an igwa nin criminal record asin nakulong na sa New Bilibid Prison poon 2014, mantang an duwa parehong nakapiyansa pa sa mga kaso ninda sa Sorsogon City.
Segun pa ki Nunez, kabali an mga suspek sa sarong emerging criminal gang na igwang 5 hasta 6 miyembro na imbwelto man sa robbery hold-up, iligal na droga, asin carnapping.











