LEGAZPI CITY-Nagsasagibo na nin hot pursuit operasyon an Albay Police Provincial Office (Albay PPO) kasunod kan nangyaring shooting incident sa Daraga, Albay ngonian na hapon, Oktubre 12, 2026, kun sain biktima an sarong Bicolano Media Anchor.
Susog sa report kan kapulisan, nagsasagibo na sinda nin imbestigasyon sa pinangyarihan kan insidente, sa Purok 4, Brgy. San Roque, Daraga, Albay sa laog mismo kan sarong Bakery.
Nabisto man an biktima na si Adrian Lorete, na sarong Bikolanong mamamahayag asin residente kan nasabing lugar.
Sa inisyal na imbestigasyon, biglang pinagbabadil suboot kan duwang dai pa nabibistong mga lalaki an biktima mantang abala ini sa pag-aasikaso sa bakery na saiyang pig-uupahan.
Nakalunad suboot an mga suspek sa puti asin itom na Honda Click na behikulo.
Basado pa sa report, pinaputukan kan mga ini an nasabing lugar asin tulos na nagdulag pasiring sa Brgy. Kimantong, Daraga, Albay.
Mientras tanto, dinara man sa Daraga Doctors Hospital an biktima ngani matawan nin tulos na medikal na atensyon.
Sa inisyal na pahayag ni Ako Bicol Partylist Representative Alfredo Garbin Jr., nagsasairarom an biktima sa medical treatment makalihis an insidente.
Padagos man an pigsasagibong hot pursuit operation kan kapulisan ngani matukoy an mga suspek asin maarestar an mga ini.
Nangapudan man an mga otoridad sa publiko na makipag-koordinar sa saindang himpilan manungod sa anumang impormasyon na igwang kinaaraman sa insidente.
