LEGAZPI CITY—Arestado an sarong 48-anyos na lalaki makalihis na pagtitigbason kaini an saiyang sadiring ina na edad 70-anyos sa Purok 1, Barangay Pinagbobong, Tabaco City.
Segun ki Tabaco City Police Station Chief of Police Police Lieutenant Virgil Bibat, sa intrevista kan Bombo Radyo Legazpi, na an suspek nadadagitan kan saiyang inang biktima huli sa may porsyon suboot kan saindang omahan o lote na isasanla kan aking suspek.
Komo sarong ina na saiya pa an nasabing pagrugaring asin madesisyon kun pano gagamiton an daga, an ini na suboot an saro sa kinauyaman kan suspek.
Pirmi pigtataraman kan ina an aking suspek mapadapit sa pagrugaring, kun sain man pigsasangla suboot kaini an daga na dae aram kan saiyang ina.
Basado sa testigo, na nakainom nin arak an suspek kan liwat ining pigtaraman kan saiyang ina asin digdi na nagkaigwa nin paninigbas.
Dugang kan opisyal na putol an toong kamot kan biktima siring man na may tama sa parteng abaga asin sa left thumb asin left index finger kaini. Sa presente yaon ini sa ospital.
Mientrastanto, naisunad na an kasong frustrated parricide kontra sa suspek asin pighahalat sa presente an resolusyon kan prosecutor’s office kun pira an magigin piyansa sa nasabing kaso. Nagpagiromdom man si Bibat sa publiko na pwedesir paghururonan asin magin kalmado sa mga siring na orolay nganing malikayan an arog kaining insidente.
