LEGAZPI CITY- Ikinamundo kan grupo nin mga paratukdo an nagin resulta kan pag-aadal kan Second Congressional Commission on Education na 1.3 million sa 1.4 million na mga Grade 11 students an may problema sa reading comprehension o nadidifisilan na magsabot kan saindang pigbabasa.
Segun ki Teachers Dignity Coalition Chairperson Benjo Basas sa intrevista kan Bombo Radyo Legazpi na dakol na mga pag-aadal na an nakahiling kan problema sa edukasyon, kaya dapat na matawan na ini nin solusyon.
Aminado an opisyal na igwang mga angat sa klase kan edukasyon urog na sa mga pampublikong eskwelahan.
Dagdag pa kaini na makahadit na an nasabing sitwasyon asin dae dapat na ipasipara kan gobierno an mga problema sa learning asin reading comprehension kan mga estudyante.
Paliwanag ni Basas na dapat na matutukan an pagbabasa asin pagsabot kan konteksto kan pigbabasa puon pa sana sa hibabang grade level ngani na mas magin madali pagtungtong sa junior high school.
Kasabay kaini, nangapudan man an opisyal sa gobierno nin bastanteng suporta sa pangangaipo kan mga paratukdo asin mga estudyante sa nacion.
