LEGAZPI CITY—Natakdag sa kamot kan mga otoridad an number 9 regional most wanted person kan Bicol sa probinsya kan Pampanga.
Segun ki Police Captain Ali Marjan Amanon, an chief of police kan Caramoran Municipal Police Station sa intrevista kan Bombo Radyo Legazpi, an suspetsado minidbid sa alyas “Vin”, sarong 33-anyos, lalaki, na kun saen may duwang kaso nin statutory rape asin warang pigrerekomendang piyansa.
Naarestar ini sa pinagsarong pwersa kan Caramoran MPS, Catanduanes 1st Provincial Mobile Force Company, asin Bacolor MPS, sa saiyang pigtataguan na istaran sa Barangay Calibutbut sa banwaan kan Bacolor sa nasambitang probinsya.
Dugang kan opisyal na inabot man nin nagkapirang bulan an pagmanman sa suspetsado huli man sa distansya kaini, asin poon kan nag-report an biktima, an suspetsado tulos na naghanap nin tyansa na humali sa banwaan kan Caramoran asin tuminago na sa Pampanga.
Alagad sa tabang kan mga kamag-anak kan biktima nahanap man liwat an pigtataguan kan suspetsado na tulos tinawan nin warrant of arrest.
Sinabi man kan opisyal na an biktima sarong menor-de-edad asin pamangkin kan suspetsado.
Mientrastanto, desidido man na magsunad nin kaso an pamilya kan biktima laban digdi.
Sa presente, paramientras na nakakulong an suspetsado sa Caramoran MPS.
