LEGAZPI CITY-Nagpaluwas an Bangko Sentral ng Pilipinas (BSP) nin month-ahead forecast na nagsasabing an implasyon para sa bulan kan Mayo 2026 posibleng mag-abot sa pag-ultanan kan 7.1% asin 7.9%, mas halangkaw kaysa sa target na 2% hasta 4%.
An paglangkaw kan presyo kan bagas, gulay, asin karne, siring man an padagos na pagluya kan piso kumparar sa dolyar, iyo an mayor na nagtutuklang kan price pressure.
Alagad, an mga rollback sa presyo kan langis, mas hababang presyo kan sira, asin an dikit na pagbaba sa presyo kan kuryente, nakabawas nin dikit sa implasyon.
Kan Abril 2026, an implasyon nairehistro sa 7.2%, na pinakahalangkaw sa laog nin tulong taon, huli sa halangkaw na presyo nin kakanon asin mga utility.
Huli kaini, nag-implementar an ahensya nin 25 basis points rate hike kan Abril ngani mapugulan an mas mahiwas na epekto kan inflation asin mamantenir an kumpiyansa kan merkado.
Pinag-aadalan naman kan Monetary Board an posibilidad na magkaigwa nin off-cycle rate hike bago an pagtiripon sa Hunyo 18, bilang simbag sa padagos na peligro gikan sa kariribokan sa Middle East na direktang nakakapektar sa presyo kan langis asin mga babarakalon.
