LEGAZPI CITY—Irido an officer-in-charge chief-of-police kan Bulusan Municipal Police Station makalihis na saksakon ini sa kinundusir na illegal cockfighting operation sa Sitio Capiricohan, Brgy. San Isidro, Bulusan, Sorsogon.
Segun ki Sorsogon PPO PIO Arwin Destacamento, sa intrevista kan Bombo Radyo Legazpi, na kan pag-abot kan mga kapulisan sa lugar an mga nagtutupada tulos na nagharali digdi.
Naabutan man kan mga personahes kan Bulusan MPS an nagkapirang mga indibidwal magin mga manok sa pinagyarihan kan ilegal na tupada, kun saen kinahoron kan saindang OIC COP na si Police Captain James Genita an mga indibiwal na naabutan.
Mantang nakikipag-olay an OIC COP sa mga nasambit na indibidwal, digdi na binalo kan suspetsado na saksakon an opisyal alagad nakalikay ini asin dae man napuruhan nin maray.
An opisyal nagsuprir nin lastro sa may parte kan saiyang likod asin ini tinawan na nin asistensyang medikal.
Sa ngunyan pig-aadalan pa kan opisina kun masunad nin kaso laban sa suspetsado.
