Uminabot na sa 961,346 Pilipino an nakabakal kan baratong P20 kada kilo kan bigas kan nakaaging Setyembre sa irarom kan “Benteng Bigas, Meron Na!” program kan gobyerno.
Segun sa Department of Agriculture, ini an pinakahalangkaw na bulanan na bilang kan mga benepisyaryo poon kan ilunsar an programa kan nakaaging taon.
Kabale sa mga nabenepisyaran iyo an mga senior citizens, indigents individuals, solo parents, persons with disability, paraoma, parasira, asin minimum wage earners.
Sinabi ni Agriculture Secretary Francisco Tiu Laurel Jr. na poon Enero hasta Setyembre kan taon na ini, labing 5.6 milyones na Pilipino na an natabangan kan programa.
Tanganing maparikas an distribusyon asin makalibre nin espasyo sa mga bodega kan National Food Authority para sa mga bagong ani, an mga benepisyaryo tutugutan na mag-claim kan saindang bilog na 30-kilogram na bulanan na alokasyon poon sa Disyembre.
Nagmamawot an administrasyon ni Marcos na ipadagos an programa sagkod sa katapusan kan termino kaini sa Hunyo 2028.
