LEGAZPI CITY — Nagluluksa ngonian an Department of Education (DepEd) Bicol sa sinapar kan sarong paratukdo asin duwang estudyante sa nangyaring pananaksak kan sarong dae pa nabibistong suspek sa laog kan Oringon Elementary School sa Brgy. Oringon, Pioduran, Albay.
Gadan sa nasabing insidente an patukdong si Mylene Durante, 23-anyos mantang irido man an duwang Grade 6 pupils na sinda Menchie Obrigo, 13-anyos asin Hazel Dela Vega, 12-anyos.
Sa ekslusibong intrevista kan Bombo Radyo Legazpi ki DepEd Bicol Director Gilbert Sadsad, kinondenar kaini an nangyari mantang ipinagsugo na sa DepEd Albay Division an pagsasagibo nin suway na imbestigasyon sa insidente.
Nag-apelar man ini nin koordinasyon sa mga residente asin pulisya sa marikas na pagtatao nin hustisya sa panggagadan sa paratukdo.
Sa ibong na lado, aminado man an opisyal na pigtutugutan an nagkapirang paratukdo na magkaturog sa eskwelahan urog na kun nakaistar sa harayong lugar siring ni Durante na labi sarong oras pa an biyahe hale sa nasabling banwaa, makauli sana sa harong kaini sa Brgy. Alnay sa Polangui
Mientras tanto, nagpaabot na man nin pakikidumamay an opisyal sa nawalat na pamilya kan biktima.
