LEGAZPI CITY-Nagsangat nin kaso an dating Presidente kan Estados Unidos na si Joe Biden laban sa U.S. Department of Justice (DOJ) ngani harangan an planong pagpaluwas kaini nin mga audio recording asin transcript kan saiyang pribadong mga pakikipag-olay sa saiyang biographer 2016 asin 2017.
Susog sa reklamo na isinangat sa federal court sa Washington, D.C., nakaiskedyul na iluwas kan DOJ an mga materyales sa U.S. House Judiciary Committee asin sa konserbatibong grupo na Heritage Foundation sa Hunyo 15.
An grupo naghagad kan mga dokumento bilang parte kan impormasyon na ginamit sa sarong imbestigasyon ni dating Special Counsel Robert Hur kan taong 2023 katakod sa pagkapot ni Biden kan classified documents.
Pigsasabi sa kaso na an proseso nin request kan komite inaabuso ngani malikayan an mga probisyon kan Freedom of Information Act na naglilimit sa pagpaluwas kan siring na impormasyon.
Naghahagad sa korte an kampo ni ni Biden na ideklarang ”not valid” asin “pretextual” an request kan komite asin tuluyang ipagbawal an pagluwas kan mga recording.
Mientrastanto, sinabi kan sarong tagapagtaram kan DOJ na mawot suboot kan ahensya na iluwas an mga recordings ngani na mahiling kan publiko an laog kaini, na suboot nagpapahiling kan kondisyon kan dating presidente.
Pignegaran man kan kampo ni Biden an mga alegasyon, asin nagsabi na an mga rekording itinao, sa kondisyon na dai ini iluwas sa publiko.
Susog ki TJ Ducklo, tagapagtaram ni Biden, na nakipagtabangan na an dating Presidente sa imbestigasyon ni Hur, na nag-iinsistir na ini bako sanang bagay nin transparency kundi pati na sa politika.
Napag-araman man na an mga rekording parte kan proseso kan pagsurat kan memoir ni Biden na “Promise Me, Dad,” na nagtutukar kan saiyang buhay mantang an saiyang aking si Beau Biden nakikipaglaban sa brain cancer.
Dati nang nagtugot an korte na makiaram sa kaso kan Heritage Foundation laban sa DOJ, alagad dai siya tinugutan na kuwestyunon an kahagadan kan U.S. House Judiciary Committee.
