LEGAZPI CITY-Maabot sa 32 na indibidwal an naarestar huli sa kasong online libel poon Enero 1 hasta Mayo 15, 2026.
Segun sa Philippine National Police (PNP) na maabot sa kabilugang 276 kaso kan online libel an saindang isinangat.
Basado sa datos kan Anti-Cybercrime Group (ACG), an mga naarestar na indibidwal, nahahampang sa kasong pagbayolar sa Republic Act 10175 o Cybercrime Prevention Act of 2012.
Sa irarom kan ley, mas magabat an padusa sa online libel kumpara sa traditional na libel na sakop kan Revised Penal Code.
Pigtukoy kan PNP na an online libel, nagtutukoy sa malisyosong pagpaparatang kan krimen, bisyo, o anumang hiro na posibleng makaraot sa dangal o reputasyon kan sarong tawo gamit an information and communication technology.
Isinagibo an mga pag-arestar asin pagsangat nin kaso kan mga special operating units kan PNP-ACG kaiba an regional, provincial, city, asin district cyber response teams sa manlain-lain na nacion.
Tinawan doon ni PNP Chief Police General Jose Melencio Nartatez Jr. na mantang importante kasangkapan an social media sa komunikasyon, kapalit kaini an paninimbagan.
