LEGAZPI CITY-Ma-apela an kampo ni Senador Ronald “Bato” dela Rosa sa desisyon kan Philippine National Police (PNP) na bawion o kanselahon an lisensya asin registration kan mga badil kan dating hepe kan pulisya.
Nanindugan an saiyang abogado na si Atty. Israelito Torreon, na pagbayolar sa ley an lakdang kan PNP.
Segun sa saiya, kaipuhan nin pormal na padusa hale sa korte o conviction ka kaya sarong opisyal na court order bago tuluyang mabawi an lisensya kan sarong indibidwal.
Dugang pa kaini na wara man nin siring na judgment o orden na ipinaluwas an arin man na korte sa Pilipinas laban sa senador.
Sinabi pa ni Torreon na nakadepende pa man giraray ki Dela Rosa an pinal na desisyon, kun balak nindang isuko an mga armas.
Kinumpirmar kan Police Regional Office (PRO) 11 na pormal nang nagserbi asin naresibe kan kampo kan senador an revocation order para sa saiyang License to Own and Possess Firearms (LTOPF) asin gun registrations kan Miyerkules, Mayo 27.
Segun sa PRO 11, sinabi kan abogado ni dela Rosa na pag-oolayan niya ini sa saiyang kliyente asin makikoordinar sa Regional Civil Security Unit (RCSU) 11 mapadapit sa revocation kan gun licenses.
An pagbawi kan mga lisensya katakod kan nagpapadagos na manhunt ki Dela Rosa sa tahaw kan mandamiento de aresto na ipinaluwas kontra saiya kan International Criminal Court (ICC).
